商台忽然向政府撤回數碼廣播牌照申請，唔玩數碼廣播，最失望嘅人，肯定唔係一班官僚而係躊躇滿志開新電台嘅鄭大班，事關商台唔玩，日後僅雄濤一個數碼電台，好難做起個勢，數碼收音機滲透率可想而知，呢盤新生意果然唔易做。
商台稱資源投放網台
商台唔做數碼廣播，表示會投入更多資源搞網上互動平台，大班噚日同八方講，商台咁講難以自圓其說，因為搞互聯網內容，即係搞網台，既然咁睇好網台，對網台咁有信心，大班呼籲商台倒不如將現時個廣播牌照交畀佢，由佢接手，讓商台專心一意搞網台，豈不更好？雄濤已進入第二階段試播，大班批評當局唔畀佢加強廣播功率，影響試播，希望唔會阻礙新電台起錨啦。