最近唔少朋友去新加坡度假，連小妹都想一家人去玩幾日。新加坡旅遊局話今年頭5個月，香港旅客比舊年同期增長超過20%。新加坡旅遊局估計，呢個暑假會係港客一家大細去當地旅遊嘅高峯期。
精品酒店富特色
新加坡近年活化咗10間有傳統特色嘅舊屋，改建成房租較平嘅精品酒店。每晚房租價錢由150至300坡幣不等（折算約840至1,680港元）。其中新加坡ChinaTown嘅NewMajesticHotel走廊通道融合懷舊與現代設計，30個獨特設計嘅客房擺放名師設計嘅傢俬、訂做嘅浴缸，樓頂高6米之餘，仲有私人花園。另一間新落成嘅Klapsons係走型格路線嘅商務旅館，每間房設計都唔一樣，採用埃及棉製嘅床上用品。
新加坡旅遊局港澳處長黃利民話，港人去新加坡度假模式近年有變，由三日兩夜改為四日三夜。年初開幕嘅聖淘沙名勝世界、新加坡環球影城同濱海灣金沙酒店吸引到家庭遊客、年輕夫婦同OL去新加坡玩番幾日。
新加坡航空嘅新航假期最新推出每位2,699港元搭A380空中巴士嘅暢玩「全新」新加坡假期套餐、3,999港元嘅3日2夜濱海灣金沙自由行套裝，仲有4,299港元4日3夜暢玩「全新」新加坡聖淘沙自由行套餐。
新加坡旅遊局教路，香港旅客可登入YourSingapore.com網站為自己度身訂做新加坡假期。
電郵：mailto:[email protected]