前晚早段花旗股市造得唔錯，道指升過百幾點，不過10600關阻力好大，指數一靠近即跌，最後仲要倒跌8點收場。花旗股市先升後跌，多少都會影響噚日港股嘅氣氛，不過港股走勢咁靚，前日成交又大增，低位有唔錯支持，恒指跌93點收市，全日波幅窄，睇嚟呢兩日會整固為主，係炒個別嘅市況。
地鐵C輪22276：地鐵（066）噚日報收27.75元，升0.36%。股價由低位反覆升咗唔少，技術走勢仍然好強，有機會升上30元，可以諗吓隻C輪22276。
隻輪現價11.6仙，2010年12月20日到期，行使價30.88元，溢價15.5%，引伸波幅29.6%，有效槓桿率8.1倍，正股升上30元，22276睇21仙，正股跌穿27元就沽咗隻輪。
俊樺