世盃轉眼踢了兩星期，晚晚睇足三場比賽都咪話唔殘，最難捱莫過於中場十五分鐘休息時間，百無聊賴又驚小休睡過頭。不怕！浸大咪神Carol教你玩小遊戲Keep住高漲情緒，十五分鐘話咁快過，又開波啦！
記者：周靜雯
攝影：梁細權
Model：Carol&Charles@StarzPeople
＊遊戲篇
得十五分鐘，小遊戲當然以快靚正為主，要玩法簡單兼可在短時間內完成，最好不需佔用太多地方，以下推介幾個小遊戲，夠慳位又刺激，連Carol都大讚好玩！
易砌易玩手指運球
分組賽剛完上半場，在家舉行的「手指足球」即時開波！玩法簡單到不得了，將食指及中指套上專用球鞋，放好兩邊龍門位置即成，球場大小由玩家決定，建議上床玩，床單皺褶會增加運球和射門難度，玩得更過癮。模特兒Charles試玩，經常把球鞋射入龍門，但足球就無影無蹤，笑都笑醒！每套包兩個龍門、兩雙球鞋及足球一個。
眼明手快射龍門
手動足球機大家玩得多，這副迷你版直接令遊戲難度升呢，因為體積變小，控制桿之間的距離又縮短，女生手指較纖細，易控制些，但男生就……難怪大戰三回合，都是Carol勝出，搞到Charles充滿挫敗感呀。
會跳的壽司盤
試玩時，Carol同Charles都玩得心慌慌，皆因壽司盤會受重而突然彈起，但幾時彈起就無人知！玩法簡單，抽一張壽司卡，卡顯示哪款壽司，就把相同壽司放到盤上，又或根據卡左上方的數字，放置相同數目的壽司，誰令盤彈起為輸。遊戲秘訣是手定加輕手，大大力放壽司，包保變大輸家。
擲骰仔鬥運氣
平時多數在酒吧玩這骰仔木盒，輸家罰飲酒，用作世界盃間場小遊戲也不錯，因為易玩又可以消磨時間嘛！木盒附兩粒骰，先擲骰，如擲到九，就可翻起數目加起來與九相同的木塊，即「1、8」、「2、7」、「3、6」、「4、5」或「9」，輪流擲，至一方擲骰後發現翻不到木塊為輸，有何懲罰玩家自行決定。
考眼力擲圈圈
活動一下身體，人都精神點！先戴這頂模仿維京人服裝風格的搞笑帽子，然後玩擲圈圈，帽上三隻角是遊戲重點，玩家要把大、中、小三個圈，順次序擲向對方的角上，若圈跟角顏色相同，分數雙倍，得分最高者為勝，考眼界，地方小小都可以郁一郁，十五分鐘好快過。
＊鬧鐘篇
十五分鐘，絕對夠讓你小睡片刻養養神，可惜最容易睡過頭的，就是這十五分鐘，所以你需要一個能讓你醒來的鬧鐘！
紅外線射紅心
見到鏢靶，就知這鬧鐘跟射擊有關，當鬧鐘一響，你就要利用紅外線槍射中紅心，響鬧才會停止，但紅心非常細，分分鐘你醒晒都未射中目標，射唔中咪繼續聽住響鬧聲囉，問你點頂？
雞牛羊輪住叫
這個鬧鐘樣子可愛，但殺傷力同樣驚人，讓你即時遠離周公。這鬧鐘會隨機發出是雞、牛及羊叫聲，哪種動物叫，你就要將屬該動物的膠片插入讀卡槽，響鬧才停止；若你插入的膠片不對，鈴聲會繼續，包保鬧得醒你！
打呵欠舉啞鈴
這個啞鈴鬧鐘確實有點重，閒時可以舉幾下。變成鬧鐘後，就要你舉夠三十次才會關掉鈴聲，啞鈴更會幫你數住次數，想偷雞做少幾次都難，睡眼惺忪的朋友，舉完這個啞鈴鬧鐘，都幾難賴床了。
A.激玩部落
（旺角信和中心M樓M16及M17號舖/31535151）
B.city'super
（銅鑼灣時代廣場B1地庫/25062888）