李老闆：車神，做咩咁早就蒲頭呀，仲兩頭望？呢度咪有卡位囉！
車神：我唔係搵位，我係搵人呀，李老闆，見唔見戰神呀？
收錢妹：頭先都見佢坐喺度喎，唔知係唔係行開咗，你搵佢咁急乜事呀。
車神：梗係有贏錢大計啦，戰神之前彈咗兩場波畀我，1場烏拉圭上盤，輕鬆大炒南非3粒，前晚又叫我買咗智利上盤，係就係驚險啲，不過都贏瑞士1:0，我呢個月嘅娛樂費都靠晒佢。
外賣仔：咦！你個財神咪入緊嚟囉！
戰神：車神，咁早見到你呀，今日冇頭場，仲有幾個鐘先開波喎。
車神：搵你就梗係攞貼士啦，你之前畀兩口我都中，問吓你今晚有冇心水嘛。
戰神：大家老友鬼鬼，心水唔會收收埋埋，今晚我就捧塞爾維亞W，啱啱我先去完投注站落注，真金白銀買落去o架！
收錢妹：塞爾維亞，咩嚟o架，係唔係非洲國家！
李老闆：好心你平時就睇多啲書啦，一日到黑掛住上網打機，塞爾維亞係東歐國家，由以前南拉斯夫分裂出嚟。
戰神：係呀，塞爾維亞算係前南拉斯夫國家中，足球實力數一數二，好多國腳都喺英超搵食，好似尼曼查維迪、伊雲洛域咁。
外賣仔：澳洲都唔係咁差啫，記得上屆意大利好辛苦先贏到佢喎。
戰神：衰在澳洲冇新血，宜家仲用緊4年前骨幹，冇晒活力，今次好有信心塞爾維亞可以打低澳洲出線。