恒地（012）主席李兆基對於傳媒提問，從來都係有問必答，講到大家夠喉為止，點知噚日一反常態，出席完旗下美麗華酒店（071）嘅股東會後，點都唔肯開口，但佢仍然係一位可愛嘅老人家，識得關心大家「食咗飯未」!恒地西半山幢天匯，由舊年創出7.1萬元一方呎嘅天價，到較早前公佈舊年賣咗24伙但成交得嗰4個，四叔曾經多次主動出嚟解畫。
適逢噚日美麗華舉行股東會，傳媒都以為四叔會借呢個機會再解釋下天匯事件，特別係最近又多咗啲傳聞，點知四叔選擇封口，就算先問股市嚟引誘吓佢，佢都忍得住，話唔講就唔講，淨係問大家「食咗飯未」。
明白嘅……恒地近日又收到地政總署查詢，天匯事件好似沒完沒了咁，四叔可能費事再公開解釋，以免出錯。之不過四叔始終係比較受傳媒歡迎嘅大孖沙，希望佢以後可以再開金口啦！
李華華
mailto:[email protected]