曾特首與余若薇辯論，社會公認曾特首輸咗成條街，曾特首亦學到一啲美國總統慣用嘅自嘲式口吻，話自己係南韓，面對阿根廷，無法反敗為勝，如果曾特首係朴智星，余若薇就係美斯啦，即使余大狀唔係美斯（事實上余大狀亦未達此級數）而只係華朗嘅話，曾特首頂多係李東國，仍然在卡士上輸一皮。
明知係咁，為乜佢要挑戰大狀辯論？一位政界高人話俾左丁山聽：「曾特首對政改方案好上心，takeitpersonal，故此要玩一鋪勁嘅！」吓。曾先生競選特首之時，曾話過要為香港政制改革，玩一鋪勁嘅，原來係咁解，自己傾全力瞓身去推銷，但推銷嘅產品，不會由推銷員決定，大公司有產品發展部（productdevelopment），又有生產設計部，佢哋設計好晒產品之後，先至由推銷員出街銷售。香港嘅民主產品發展部設於何處？誰人是最高主管？現實啲講，點都唔係位於上下亞厘畢道，即如可口可樂嘅香港分公司，要向美國喬治亞州阿特蘭大總部報告一樣。
有此限制，曾特首只能話係食得鹹魚抵得渴，全力推銷一件佢有份俾意見，但無全部權力去設計嘅產品，佢做得好勤力，絕不卸膊，俾余大狀譏笑為推銷員推銷次貨，唯有有苦自己知。
成班老友飲茶作賽後評，一致認為特首勝在心口寫個勇字，明知不敵，仍然夠膽上擂台，至於雙方陳辭，其實全無新意，老早可以預測得到，各說各話而已，不過在互相問答方面，余大狀夠機動，表演吓Ｃ朗插花，十分悅目，特首就似簡拿華路打中堅，速度慢，轉身慢，觀眾睇到，為佢着急。古人話三歲定八十，特首就係四十年公僕生涯定晒形，成個高官款，只敢依書直說，不敢爆肚，在辯論場合，當然吃大虧。飲茶老友之中，餐飲Ｍ與律師Ｎ皆是港島居民，在補選中投陳淑莊一票，佢兩位都話特首開了政治辯論之風係一件好事，希望呢次會成為一個本地政治嘅慣例（convention）喎。