「為了明天6.23，我買了支槍！」星屑醫生今次講堅，噚日重喺fb事先張揚，佢今次一共買咗五支槍，有長火有短火，準備今日包圍立法會時做嘢。大家唔使驚，警方唔使怕，星屑所指嘅槍，只不過係一支泡泡槍，同四個噴水樽槍頭。
自動噴射肥皂泡
最貴嗰一支槍，係一支自動肥皂泡噴射槍，售價22蚊，喺灣仔太原街玩具店買嘅，星屑形容係「高科技結晶！」佢話今日會在立法會外開槍噴射泡泡，營造六月飛霜效果，表達爭普選嘅人被削奪民主係幾咁慘，睇吓到時會唔會俾警察話佢用泡泡襲警，或者俾食環署控告冇申請娛樂牌。
由於星屑醫生同時組織了「社運醫療小組」，因此佢另外買咗四個噴水槍頭，5蚊一個，適用於任何水樽，佢試用後話滿意效果，用嚟為中咗胡椒噴霧嘅人洗眼一流。「洗眼效果相當不俗，花灑式噴水又得，唧細水柱亦得，勁good！」