外賣仔：世界盃今晚開始冇七點半頭場睇，應該冇咁忙啩！
李老闆：作死呀你！冇咁忙即係唔多客啦，唔多客入嚟食嘢睇波，咁我仲邊有錢出糧畀你呀？你望都望個場同上個禮拜一樣咁旺啦！
收錢妹：老細，有早場個陣你都搵唔少啦！況且嚟緊幾日10點場有「雙料娛樂」，個場肯定仲旺啦！
李老闆：你估家好似以前啲香港波咁，踢完頭場再踢尾場，一張飛睇晒兩場呀？世界盃兩場同時間開波o架，我間舖就得一部電視、一個解碼器，你話揀邊場畀啲客睇先啱？
外賣仔：老細，咪咁孤寒啦，嗱嗱淋裝多部高清電視機，一齊播咪唔會得失啲食客囉！況且第日「畸寶」播英超或者有可能同時間播幾場，有兩部電視包保滿足到食客。
車神：話時話，今晚10點嗰兩場，法蘭西會唔會俾烏圭同墨包夾計造死呢？
李老闆：換轉我係墨西哥或者烏圭球員，都唔會搏啦！鬥hea齊齊出線，留番啲力喺16強先至搏過！
馬交文：馬會嗰和波賠率一早已經壓到得番1.5倍，你話唔會和波真係冇人信。
車神：法蘭西都係自己攞嚟衰o架啦，內訌到罷操咁醜嘅事都做得出，鬼唔望佢哋輸畀南非，包尾出局，等班法國躉死咗條心！