阿姐汪明荃噚日同廖碧兒、黃智雯、孖仔周志文、周志康去到奧海城為劇集《居家兵團》拍外景，一身清潔女工打扮嘅阿姐話今次係有史以來最輕鬆嘅造型，因為唔使扮靚。劇中要落手落腳洗地洗廁所，阿姐話細個時樣樣家務都要做。《超級巨聲》周志文同周志康今次做阿姐嘅孖仔，佢哋大讚阿姐親切無架子，仲安撫佢哋話唔使緊張㖭。