由2004年起，每年6月12或19日，全球60個國家都湧出千百萬條赤裸肉體，上街踩單車，宣揚減少廢氣多踩單車的環保理念！集群眾力量，波濤洶湧大海無量，點睇都勁過新8模！今年連台中都首次加入戰陣，放膽一脫！
記者：陳慧敏
攝影：陳慧敏，部份相片由蘋果日報提供
鳴謝：台灣觀光協會,HotelOne
一脫謝天下
WorldNakedBikeRide，以脫宣示一切以最原始的身體為重，減低碳排放及用油的環保理念，你個Body緊要還是請你食廢氣的跑車緊要？不過更重要的，是光脫脫先夠爆，又引人注意，宣傳效果先至勁。管你宣揚死到臨頭開少陣冷氣，無人睇，始終枉然。
背負着副刊仝人為「裸踩」一事掀起的大堆問號興致勃勃來到台中。落機，豪雨。
活動當日還只剩22℃，原先約好的起碼80個參加者，現場得番廿人，死……喇……大會在市民廣場集合，身穿海豚裝、紅禮服、嘉年華裙、心口畫哈哈笑的大家都跑到樹下躲雨。懷疑隱身樹下的實Q兩秒內出現趕人！但目標好明顯針對住只着住條（似孖煙囪的）沙灘褲，背上架着「改善空氣」的黃色大旗幟，架單車都高人一等特別搶眼的Sean。沿路，一排電單車軍警圍住我們在戒備，「保護」我們。
「在台灣，申請路線很容易，但要當街脫盡就好難；在波蘭，申請路線難，除衫好易。」由波蘭來，向大家宣揚愛護「白海豚」的Katherine說。不過，依然引得沿路踎街邊洗豬腸準備開檔的大腸肉店肥佬定格同爆笑！下次，再去盡啲！
6月最後一脫
今年宣揚環保的WorldNakedBikeRide都在3月及6月大致結束，仍想晒命一脫的，你可以等明年3月去南半球趕早場，過兩日還有6月25日及26日，在西雅圖的SummerSolsticeCelebration。這本來是個由1974年開始，為藝術家MichaelGonzales慶生的紀念活動，盛大的PARADE每年吸引成十萬人參加，其中26日都有一場NakedBikeRide環節，本來是為ShowOff整色整水離奇古怪的單車藝術，加埋人體彩繪，就順便變埋NakedBikeRide活動，攝位宣揚環保喇。香港人做事爽快果斷，最快的就係上網登記組織一個！踩開有條癮的更可以搞「月經聚」每月一次！重唔紅過新8模？Call我！我實幫你煲大佢！不過已在波蘭脫過三次的Katherine說：「露太多會越來越少人，唔矜貴o架！」
「赤」的疑惑
由我出發到回來，身邊的朋友都不停問我究竟點「脫」得合乎基準，求學動機異常強烈，現解答眾人疑惑如下。
Q1：當街露點，差人拉喎！
A：你同我定！一來每年各地活動都會跟有關當局劃定路線申請，另外各國對「裸」的定義不同，法例都講唔清好難掌握。所以咪要塗Custom囉！有時你只係用膠紙黐住重要部份已經見得人，不過當然要尊重各個國家的文化及法例，你試試喺中東着條三角褲周街走？後果自負！
Q2：光脫脫踩單車，「細佬妹」咪好傷？
A：無人叫你搵張硬過鑽石的單車椅，包尿布踩都痛啦！揀張舒服的，或者加個墊上去。而且活動路程多數平坦又簡單，車程頂多個幾鐘，唔使扮黃金寶。
Q3：我個XX會唔會掂到架單車o架？污糟喎！
A：會掂到的！不過除非你已經「好病」整污糟張凳，否則活動歷史上都未見過有人因此染病。如果你仲係驚，你可以A.先冲凉（連人帶車）；B.搵塊布包住張凳。
Q4：無單車，點算？
A：當地的單車舖一般都歡迎你借單車裸踩，並於事前事後幫你消毒。Bike者，其實只要係利用人體力學自己發力推動就得喇。滑板、滑板車、Roller-Blades，有本事的找朋友拖你行都得。好似這位不懂踩Rollar的朋友，要現場警察扶住都得。
Q5：唔除係咪不能參加？
A：No啦！大會口號「夠膽你就除」（AsBareAsYouare），即係你鍾意着到潛水咁都無人怪你，但你係鵪鶉還是個人主義先？
Q6：我八字胸水桶腰啤酒肚，性感負資產影響市容，點睇？
A：（官網原文繙譯）咁你就要來啦！我們會一齊慶祝你那獨一無二，個性十足的身體！無論你高矮肥瘦大×細×，尊嚴！尊重！係你應得嘅！
更爆的是，這一程會向大家宣示，原來身材係可以是好多款的，而不是傳媒所谷出來只得一款，令人不安（係呀！佢寫"unsafty"的！）。
NakedinTaiwan
溫馨提示：台中脫的管制頗嚴，像Sean提早一個鐘出場，已被實Q望實。事前請向政府部門申請！
TravelMemo
持特區護照或BNO，14天內來回可申請網上或落地簽證。
查詢：25258316（中華旅行社）
6月30日前訂購及出發往台北機票，由$1,170起。網頁： http://www.hkst.com/（學聯旅遊）
1港元約兌4.10新台幣（文中價錢已折算港元）
電壓：110V，兩扁腳插座
查詢： http://wiki.worldnakedbikeride.org
台灣 台中
下周雷雨23-32℃
