世Cup狂：入球少　睇啤酒妹補數

世Cup狂：入球少　睇啤酒妹補數

「又係窿對窿！」「又係一孖大眼睛！」「射極都攻唔入。」「兩隊鬥Hea唔攻嘅！」今屆世界盃入球偏少令球迷呻悶，但又爆冷頻頻令球迷輸錢，好彩，世上還有啤酒妹，性感制服加親切笑容再加贈品，總算為緊張而不刺激的分組賽加分，無波入睇女補數啦。

記者：梁美
攝影：楊錦文、譚盈傑、陳盛臣

百威
波褲仔有活力

數制服最燦眼兼符合世界盃主題，非百威莫屬，啤酒妹六月轉換最新裝束，是唯一穿超短波褲的啤酒品牌。「落場踢波都係着波褲o架啦，」「ATPub」內，啤酒妹Crystal笑容好甜：「燦爛笑容，係唔少得嘅Sell酒技巧。」百威是世界盃大會指定啤酒，制服胸前印上大力神盃圖案，加對紅底白間長波襪，當真動感十足，連球迷Rhys都大讚：「鮮紅色衫夠吸引，如果再緊身啲更正。」看到笑容滿臉的Crystal不斷穿梭場內，輸波都笑得出！

■胸前有大力神盃圖案，搶！

■波褲有「10」字樣，十號仔是最好波的。

■紅底白間波襪襯修長美腿，有活力。

■腰間打個小結，令腰肢線條更突出。

■點兩打啤酒送精美打火機。

■點一打送獨家紅Tee。

■燦爛笑容，是Crystal賣酒必殺技。

■Rhys：「靚女叫到，當然要叫番支捧場喇。」

■日本遊客InaiKeiji（左）及Kokishima，也來酒吧湊熱鬧。

■鳴笛，人人坐定定等睇開波。

（ATPub：尖沙嘴赫德道19-23號地下及1樓/23013201）

生力
隊長臂章似模似樣

生力啤以「全港球迷大召集」為口號，世界盃期間推出十二個球迷會，啤酒妹的紅襯白新制服亦以球迷會為題，當中以西班牙、巴西、英格蘭三大最受港人追捧球隊更是主力，外套印上三大球迷會的象徵動物圖案，贈品也以三大球迷會為設計基調，火機、筆、傘、帽、迷你足球等每種贈品最少各有三款。酒吧「BarnII」內，啤酒妹Yan落力Sell客兼──幫我手找人做訪問拍照，問球迷Vincent與Elvis可會受Yan吸引而幫襯其品牌啤酒？他們異口同聲：「會！」Vincent補充：「因為係男人都鍾意睇靚女。」男人，就是如此簡單的動物。

■外套左襟有金球圖案，既賣廣告又切合世界盃主題。

■順序黃白紅，左袖有巴西、英格蘭、西班牙球迷會象徵圖案。

■大大個紅底白「C」，右袖大玩隊長臂章，都幾似模似樣。

■鮮紅色小腰包，方便存放私人物品及體積較細的各類贈品。

■左起Vincent、Yan與Elvis來個大合照。

■點打半啤酒即送迷你足球，唯一品牌有足球類贈品。

■怕醜不望鏡頭的李先生（左）：「最主要看價錢和個人口味，啤酒妹，靚唔靚唔會影響我選擇。」

■這個生力啤專用酒櫃，非常金碧輝煌。

（BarnII：銅鑼灣謝斐道470-484號信諾環球保險中心1樓/25910346）

嘉士伯
純白短裙夠搶眼

嘉士伯是英格蘭指定啤酒，於世界盃期間舉辦多個大型推廣活動，包括蘭桂坊嘉年華及大小抽獎，所以蒲「修士吧」，不難看到嘉士伯啤酒妹周圍走。Amy與Vanki一身純白，超短迷你裙踢多對波鞋，在漆黑的酒吧內份外搶眼，無波入？就呷口冰凍啤酒，望望靚女長腿吃冰淇淋補數吧，就如球迷NickKhem，目不轉睛盯着兩位靚女，更狂打贈品主意：「本身飲開呢隻啤酒，鍾意佢哋啲贈品種類夠多。」

■屬英格蘭球隊指定啤酒，怎少得英格蘭隊徽？

■腰包用回品牌顏色綠色。

■新制服背後有4、6、8、10等幾個號碼。

■NickKhem主動上鏡，更問啤酒妹索取精品。

■點半打，即送筆、火機或照明匙扣。

（修士吧：尖沙嘴金巴利道1號諾士佛階2樓5號舖/23177308）

黑牌
神秘高檔

蒲開酒吧的人都知，黑牌威士忌推廣女郎的制服一向行高檔路線，未知是否配合品牌色彩，制服差不多全身黑，只以少少黃色點綴，上衣以貼身剪裁的絲絨取代皮料，加件小外套及長靴。駐場新開張酒吧「HotShot」的Christine與阿寶就是表表者，穿上制服的她倆顯得既大方又高貴，不過球迷Francis另有意見：「套衫太黑嘞，換旗袍更有美感。」這品牌素來也有演唱會門票贈送，今期未知會送誰的演唱會？

■全新外套，手臂位置繡有品牌徽章。

■外套左右襟簡單地用繩繫緊。

■腰包設計與服飾夠統一。

■點一支酒送火機，兩支或以上則送電話座、卡片座或演唱會門票。

■球迷Francis

（HotShot：尖沙嘴漆咸道南53-55號嘉芙中心地庫）

■入門口即見大大個酒櫃及大型半圓吧桌，型！