黎明一向有金句王之稱，佢噚日去咗會展，為服務多年嘅公益金撐場，表揚一眾善心捐款嘅機構、社團。
原來佢老婆、黎太樂基兒都好大手筆兼有善心，舊年捐咗超過20萬善款，得到公益嘉許獎。黎生話老婆有工作在身，有獎會幫老婆攞喎！
話JW唔見人冇禮貌
講開老婆，樂基兒早排喺台灣話差唔多夠期要生BB，問佢打算幾時生？黎明即刻話：「有啲嘢真係唔可以強行，啱嘅時間做啱嘅嘢，你哋成日問我幾時有BB，我都想問點解有BB？人嘅際遇交番畀我。」黎生仲好生動咁即時做埋做愛嘅動作，話：「咁當然強行做就會做，家我冇做，即係呢分鐘唔想要住！」
提到呢排佢嘅新人JW，似乎佢公司想繼續玩神秘，黎明就話JW下個月會開音樂會幫聯合國兒童基金籌款，仲話：「暑期見人，唔係就冇禮貌。」出動到老婆樂基兒，同鄭雨盛拍JW嘅MV《男人信甚麼》，黎明話首歌係講女人信唔過喎，問佢兩公婆合作係咪特別夾？黎明就繼續好有深度咁話：「啱先可以一齊工作，啱嘅人先可以喺埋一齊，但係，唔適合一齊工作，都可以一齊生活。」吓！哦。