李克勤今年3月再做老竇，愛妻盧淑儀幫佢追多個囝囝Rex，屋企多咗位成員，克勤今個父親節自然過得特別熱鬧。噚日父親節，克勤一早7點幾已經喺微博好開心咁話同家人食大餐：「早晨各位，祝大家父親節快樂，也期待着我的父親節大餐……」
不過，父親節前夕，克勤都不忘同老婆大人拍拖睇波。克勤雖然身為英格蘭擁躉，但對前晚嗰場荷蘭對日本嘅世界盃賽事都相當關注，約埋大班老友一齊喺外面睇波食飯。不過，場波7點半開波，克勤先至同老婆喺銀線灣屋企出發。
微博賀阿旦
前晚7點半，克勤揸部波子Jeep接老婆去尖東嘅帝苑酒店，由於已經開咗波，克勤為趕時間而踩行油，唔使15分鐘已經到埗。克勤停低部車之後跟老婆傾咗幾句，就先落車搵酒店嘅代客泊車，盧淑儀一直留喺車廂。馮仁昭問克勤係咪慶祝父親節，但克勤猛咁耍手擰頭話：「冇呀！睇波咋，你哋都睇波啦。」跟住就急急腳同盧淑儀入咗酒店，場波結果荷蘭贏咗日本1比0。
另外，克勤噚日喺微博同阿旦鄭丹瑞互祝父親節快樂，順便恭喜埋阿旦監製、房祖名同薛凱琪主演嘅《分手說愛你》票房成績理想。