世界盃開鑼，即使平時無睇波習慣，都會睇番幾場，否則點同人吹水，多人睇波食肆自然勁旺場，而碟場雖則未靜到拍烏蠅，不過冷場居多，這個星期新影碟選擇唔多，最後揀咗這隻《末世天書》煲一煲！
記者：許福合
遇敵殺敵
《末世天書》其實若從視覺效果來睇，一啲都唔弱，據講用咗8千萬美元製作，加上丹佐華盛頓這些大明星，卡士十足，而電影中亦經常出現宏偉場景，雖然電影接近現實派，無機械人打鬥，不過淨係睇丹佐華盛頓一直大打出手，都夠過癮。故事講到世界大戰後，以往的文明人去樓空，丹佐華盛頓找到最後一本存在的《聖經》，並且帶住佢向西方進發，途中遇敵殺敵，最後成功將《聖經》送到，再次將《聖經》光輝發揚。故事充滿暴力，不過一般評論大多批評導演將一個暴力世界拍得如此文靜，認為浪費咗一個可發揮的劇本。
色調特別
其實，如果唔介意少咗啲爆炸場面，個人相當喜愛《末世天書》，無論是攝影角度取景，到畫面色調，都與一般電影不同，甚至有在看黑白電影的感覺，對睇慣色彩豐富的觀眾，效果出奇地特別。不過，雖然畫面好多時都係黑黑白白，不過唔代表無嘢睇，而且仲幾考電視質素，筆者就試過在LEDTV同舊款LCDTV上比較過Blu-ray碟的畫質，發覺在新LEDTV上，明顯層次感、畫面內容都睇多好多，所以用這隻Blu-ray來試機其實亦係個好選擇。
留意動作場面
睇碟時，重點可以留意，就係丹佐華盛頓的動作場面，事關佢原來搵來丹伊諾山杜做武術指導，而片中大部份搏擊或揮刀射箭的場面，丹佐華盛頓都係親身上陣，所以睇完成套電影，你可以對故事無印象，更可以唔記得女主角，不過一定記得有場丹佐華盛頓一個打十幾個嘅場面，鏡頭一鏡拍晒，差唔多打咗成分鐘，睇落勁過癮。而講到全片最令人意外，係原來丹佐華盛頓竟然係盲人，其實影片中都有唔少地方透露過，例如丹佐華盛頓聽力特別強，而背包內的卡片同《聖經》內的凸字更係一個暗示，但始終鋪排同信服力都不足，觀眾睇落並無真相大白的感覺，明顯眼高手低。
Bonus有艾利之旅、電影原聲音樂製作同刪減片段，我覺得最好睇係艾利之旅，有導演出來解釋吓畫面背後嘅含意，都幾有意思。另外仲可以睇到構思圖同場景製作，相當有趣。
