沒有一個男性生出來便可稱職做好爸爸，轉眼張堅庭已當了16年爸爸，他認為爸爸這份工絕對難過做導演，不容閃失或NG，否則會對子女造成重大影響。今日父親節，阿庭不期望三名子女回報驚喜，只願他們可健康快樂，自己繼續肩負一生還不完的兒女債，孩子們都乖巧感恩，異口同聲大讚阿庭是心目中100分好爸爸。 撰文：比華利
父親節這個大日子，當然要和爸爸好好慶祝，以答謝他的辛勞，導演張堅庭一家五口是娛樂圈中模範家庭，父慈子孝，為了做好三名子女的好榜樣，阿庭堅持做到老學到老，早前報讀了北京大學的課程，前日更到了北京開學，今日父親節無暇趕回香港，三子女高銘（Justin）、一諾（Jasmine）和高翔（Jonathan）大前晚先與爸爸慶祝，當天活動是陪阿庭到海運戲院觀看3D阿根廷對南韓的世盃賽事。
阿庭一改平素的斯文形象，換上球衣觀賽，他與太太楊諾思及三子女戴上3D眼鏡排排坐，當看到阿根廷奮戰入球，全家即手牽手振臂歡呼。由於3D視覺效果猶如置身場中，當鏡頭拍到足球射出，阿庭和幼子Jonathan為怕食波餅，動作一致側身閃避，阿庭說：「咁樣睇波我好似置身現場一樣。」
乖女營造驚喜
阿庭表示自16年前太太楊諾思為他誕下長子Justin後，他便開始還兒女債，雖然子女長大，責任倍升，債務都越來越重，但他還是孭得開心，阿庭說：「人生可以有好多蝦碌，但做咗人哋老竇之後，我同自己講係冇得蝦碌，乜都要安全啲、小心啲，因為會對子女日後造成深遠影響，雖然佢哋都長大，有自己思想同意見，但我依然會擔心佢哋一生一世。」
父親節當前，阿庭坦言並不會大事慶祝：「如果子女孝順，日日都係父親節，唔需要指定邊一日去慶祝，呢啲節日係畀啲唔係成日見到老竇嘅人去慶祝，家變得好商業化，我好多年前都叫啲仔女唔好送嘢畀我，我叫佢哋身體健康，乖啲就係我最好嘅禮物。」
話雖如此，現年13歲的二女Jasmine十分有心思，早已秘密準備了小禮物，留待父親從北京回來後送上驚喜，她堅拒透露只肯說：「我會送啲嘢畀佢，但我唔講。」
阿庭指三年前父親節曾收過Jasmine一個自製鞋盒做禮物，盒上盡寫上她自己承諾要戒掉的陋習和過錯，阿庭當住女兒前爆料：「不過好似到家都未改過。」Jasmine遭踢爆後一臉尷尬，還輕輕向爸爸鬆踭，示意他封嘴，但阿庭仍取笑女兒：「你睇佢幾惡。」實情兩父女大晒溫情。
主張因材施教
問到阿庭對三名子女有甚麼期望？他即說：「我希望盡量栽培好佢哋，大仔醉心電影，我遲啲會安排佢去美國進修電影課程，細仔鍾意足球，我就畀佢接觸多啲同球賽有關嘅知識，囡囡喜歡唱歌跳舞，我唔反對佢入行，只要佢有潛質就會幫佢，否則係咁谷佢入行咪盞累死佢，我主張因材施教。」
始終女生最令人擔心，所以阿庭希望女兒18歲才拍拖，他說：「家讀好啲書先，遲多兩年大啲先拍拖，佢雖然把口應承我，但分分鐘聽日就去拍拖。」阿庭嚴禁女兒早熟談戀愛，豈非將來對女婿挑選也嚴格？他已一派外父口脗：「我將來揀女婿要佢有幽默感，工作認真。」
長子幫口撐父
在三名子女心中，阿庭絕對是No.1好爸爸，長子Justin和幼子Jonathan異口同聲讚爹哋是稱職100分冇得彈的好爹哋，惟獨Jasmine要扣阿庭10分變90分，她口直心快：「爹哋有時好煩。」阿庭聽到立即為自己被指為「常哦」解畫，他解釋只是提點子女日常生活瑣事，怕他們吃太多垃圾零食或看太多電視。
一直沉默不語的長子Justin也為父親開腔：「做爸爸嚴格啲好，咁仔女先乖啲。」阿庭聽到長子思想成熟的說話後非常安慰，他開心的說：「呢句說話真係我最好嘅父親節禮物。」
語畢，Justin馬上反問其父：「幾時父親節？」阿庭和Jasmine都被弄得啼笑皆非，看到這一幕，真的不難相信阿庭全家都不太重視父親節，正因為他們天天活在開心的父親節當中。
幼子狂熱足球
張堅庭出名是球癡，原來張家老么、現年10歲的張高翔（Jonathan）更是足球小將，去年在港參加巴塞隆拿和傑志合辦的香港巴塞隆拿足球學校，每周均要練習，早前被挑選到巴塞隆拿接受特訓，全家上下也非常支持，所以今年世界盃，全捧西班牙球隊。
廿四孝跟得媽咪
老爸帶頭說：「西班牙球員大部份都係嚟自巴塞隆拿，所以我哋全家都熱捧呢隊，好似沙維、恩尼斯達、碧基等，西班牙嘅球員搓波技巧好，傳送動作又好靚，仲好識用腦同體力，我好欣賞呢種風格，佢哋有八、九成機會晉身16強。」
在巴塞足球學校集訓差不多一年的Jonathan現職中場，小小年紀的他充滿大志，希望長大做職業足球員：「我6歲開始跟爹哋睇波，後嚟有機會踢，越嚟越鍾意。」
楊諾思熱愛足球的瘋狂程度近年才升溫，阿庭更爆料指太太非常緊張兒子的每場賽事，楊諾思笑說：「囝囝支持邊隊，我就支持邊隊，Jonathan最鍾意阿根廷嘅美斯，佢都效力過巴塞，囝囝去過巴塞隆拿特訓咪鍾情西班牙隊。」