前日行街見到麥兜，佢肥咗又靚咗，原來佢呢排好勁，首次代表香港，幫旅發局到內地台灣宣傳。
一手創作麥兜嘅麥嘉碧唔抵得麥兜咁囂，話春田花花幼稚園嘅小朋友都有份，「仲一齊爬龍舟」。麥太轉頭又忍唔住爆麥兜有新搞作，原來繼《麥兜响噹噹》北上學功夫後，麥兜會首次拍歌舞片，她說：「佢識唔識跳舞？佢手短腳短，你話佢識唔識？」佢話麥兜會再帶大家感受香港城市風光，仲請本地漫畫家楊學德幫手，設計好多騎呢嘅道地小人物。
幫旅發局宣傳香港
楊學德作品風格好唔同，如《不軌劇場》角色都係好麻甩，但麥嘉碧話估唔到同麥兜都好夾o架喎，「其實楊學德嘅角色雖然個樣好惡咁，但內心同麥兜一樣善良o架」。新片下年就有得睇。
麥兜喺中港台都受歡迎，麥嘉碧話因為全世界嘅小朋友都面對學校壓力問題，大中華區嘅小朋友更加大同小異，尤其係家庭方面，都係鍾意節慶時一家人食飯，「中秋節食、端午節食，乜嘢節都係食」。
所以佢好開心幫旅發局設計節慶年小冊子，仲有A至Z共26款貼紙，由於反應太好，旅發局仲專登另外印咗一批貼紙，送畀嚟香港玩嘅小朋友，如果有朋友帶埋仔女嚟香港玩，記得去旅發局旅遊中心攞呀。
吓？我係咪真係遇到麥兜，你唔係真係信呀。
電郵：mailto:[email protected]