政改爛方案無藥可救，所以前晚余曾辯賽果可以講情理之中，意料之外係煲呔表現咁差，中環好多馬後炮與事後孔明。工聯會王國興話自己早料煲呔未辯先輸，「我係最早講，有先見之明。」佢形容煲呔今次「雞蛋撞石頭」，又話自己諗咗兩條好橋，可惜煲呔事前冇問佢，否則不會慘敗。
王國興話煲呔應該形容方案係「上車盤」，說服市民「騎牛搵馬」，咁講淺白易明，市民實buy。另一議員葉劉稱，煲呔唯一可取係講英文時比較流利自然，要拜殖民地培育所賜，「以前經常要同英國老闆溝通，家一講中文即時出事」。
不過煲呔敗筆就頻頻讀稿，「咁就唔係政治家啦！」佢話自己曾經在浸大同余若薇用英文辯論政改，「嗰次起碼我冇輸。」葉劉指煲呔今次累街坊，令支持方案議員同參加今日撐政改遊行嘅人「蒙羞」。