煲呔喺政改辯論中表現惡評如潮，偷睇貓紙舉動被市民大扣分，慘敗於余大狀手上並不意外，奇就奇在佢噚日出席扶輪社午餐會講政改時，又突然返番嚟，揮灑自如講埋棟篤笑，完全唔使睇貓紙，同前一晚判若兩人。
笑指老婆不留情面
輸足幾條街嘅煲呔噚日玩自嘲，話有人以世界盃阿根廷大數南韓4比1為例，形容佢同余大狀實力差距大。佢仲引述曾太鮑笑薇嘅批評更加不留情面，指南韓至少都打得過對方半場，煲呔卻連半場都過唔到；曾太又話煲呔平時嗌交都嗌唔贏佢，又點會贏到余大狀？
落敗對煲呔嚟講可能係意料中事，亞視在辯論後，搵牙擦練馬師食力簡評論余、曾表現，煲呔話令佢十分驚訝。佢估到有時裝界人士評論佢嘅衣着，有人研究佢黑面指數，但點都估唔到自己會俾人當成一匹馬咁評分。煲呔又食住世界盃熱潮，話世界盃贏家只得一隊，但係政改方案若果可以通過，全香港社會都係贏家。唔知同佢一樣初賽俾人狂數嘅南韓，有冇機會爆大冷捧盃呢？