聽日就係父親節，小妹負責幫老爸諗吓有乜嘢節目；呢輪時晴時雨，帶老爸逛吓商場都唔錯，有唔少免費活動選擇。九龍站圓方商場公關老友Rebecca話，男人最愛其中一樣「玩具」係靚車，所以商場特登喺父親節舉辦名車展，放滿40幾部總值近億嘅超級跑車任人睇，紅色、白色、黑色等乜嘢顏色嘅車都有，包括全球最快、最輕嘅林寶堅尼LP570-4Superleggera，電影占士邦最鍾意揸嘅AstonMartinDBS等。
名車女模任你影
齋睇齋影車有啲悶，有埋女模一齊影好似熱鬧啲噃？Rebecca話，都知男人鍾意名車配美人，商場喺聽日劃咗下晝兩點半同五點兩個時段，派出女模到場挨住啲車畀龍爸影相。五點嗰陣仲額外搵埋SuperCarClub嘅御用攝影師ChesterNg，即場教影車相技巧㖭，「父親揸車嚟商場可以免費泊車3個鐘。」
鍾意高級影音嘅發燒爸唔好錯過去數碼港嘅高級視聽展，喺金鐘有免費接駁車直上數碼港，睇吓畫面鮮艷3D電視，聽吓高清帝女花，都幾爽吖。最筍係唔使任何消費就可以參加抽獎，贏番部40吋3DLED電視機。
喜歡綠色生活嘅環保爸可以去樂富商場嘅農夫巿集走走，場內擺有20多檔攤銷售有機農作物、環保產品，另設環保手作坊畀環保爸自製有機豆漿等。
電郵：mailto:[email protected]