政制向前走大聯盟今日下晝4點在維園舉行萬人撐政改集會兼遊行，一於晒冷支持政改方案，在派錢、海鮮餐、食點心及韓國燒烤種種利誘之下，加上不同威迫手段，今日場面保證壯觀，但喺一片起錨呼聲中，八方卻聽到少少寃屈聲。
由於有闊綽同鄉會派200蚊叫人今日上街，又有地區團體30蚊請食海鮮，有啲冇咁富貴嘅左派團體中人就同八方吐苦水，指唔少街坊、會員都問點解冇錢收、冇嘢食，呢啲「寒底」組織人士話，平日佢哋搞蛇宴都冇補貼咁多，最少要收一百幾十蚊位，今次真係俾啲富貴同鄉會玩死，最弊係有人以為佢哋孤寒兼「落格」，將上面分派經費自肥，黃河水都洗唔清o架。