上海電影節主席講壇前日開始，好多著名華人導演，好似電影節評委主席吳宇森、彭浩翔、內地導演王小帥同埋台灣導演鈕承澤都有出席，討論同呼籲中國電影走向多元化路線。
彭浩翔話近年中國電影嘅導演同投資者太急功近利，又炮轟導演好似香港播電視咁，喺電影裏面插入廣告，行為令人蒙羞，佢話：「中國很多商業電影的廣告植入已經很嚴重了，到了不要臉的地步。我不是說完全不可以廣告植入，但是你要尊重電影，我們是要觀眾看一個故事，不是為了看90分鐘的廣告。」
吳宇森：太多跟風電影
主持何平講到有位大導演，被投資者強迫要補拍植入廣告嘅鏡頭，拍完後嬲到打爛張枱，王小帥就即場踢爆嗰個導演就係馮小剛。吳宇森就覺得中國電影量增加咗，但係就太多跟風嘅作品。
此外，成龍同積頓（JadenSmith）主演嘅電影《功夫夢》噚日喺上海舉行記者會，除咗佢哋之外，擔任監製嘅韋史密夫（WillSmith）都有到場支持囝囝。成龍喺訪問時話好鍾意積頓仔，好想認佢做仔咁話，對於房祖名，成龍話：「他們兩父子在片場永遠有商有量，冇打冇鬧，講真，唔打‥‥‥我就唔得，對住房祖名‥‥‥」佢就冇再講落去，只係擺出個起腳欲踢嘅樣。