日本實試　跑化Wish2.0　爸爸也飆彎

皇冠拉大隊邀傳媒到東京試車，故作神秘唔肯透露係咩新車，但就事先張揚其中一日會落Track。凌志LFA咁爽？到賽車場前一刻宣佈：「全新日本本土版Wish！」噢，嗰刻的確有啲失望，不過當我落場揸咗幾個圈後，發現自己忍唔住越飆越快、彎位越入越貼，先真正感受到換上VALVEMATIC引擎嘅Wish原來咁好玩，各位爸爸，你哋有福喇！

記者、攝影：許維雅
鳴謝：皇冠車行

一向雄踞七人車MPV市場嘅豐田，舊年已不停催谷尺碼最細嘅七人車Wish，估唔到今年主角仍然係佢。大陣仗拉隊過日本，豐田代理皇冠無非想同傳媒強調未來兩大新方向，第一，可能受美國回收風波困擾，下半年到港新車都以日本本土版為主；第二，就係等大家試真豐田副全新研發嘅VALVEMATIC偈，因為佢將會逐漸成為各款2公升容積新車嘅心臟。

■VALVEMATIC車章代表慳油又環保嘅新引擎。

新偈大力唔大食

據日本豐田製品企劃總經理大井先生講，花咗約4年時間研發嘅VALVEMATIC，係豐田喺引擎技術上嘅一大突破，透過電腦控制進氣閥開關時間及大小，以引入更多空氣幫助燃燒，進而提升馬力及加速反應嘅同時，亦將燃油減到最低達致慳錢又環保嘅效果。道理大家都明，實際上Wish勁咗幾多？比起上一代Wish2.0，同樣2公升容積，馬力提升咗18匹，扭力則增加7Nm，燃油亦減至15.5km/L，以每公升油$14計算，約$0.9/km，實在好抵。其實要將VALVEMATIC引擎嘅性能發揮得最好，原來2.5公升容積先係最佳，但限制於CVT波箱只適合2.4公升以下嘅引擎，所以全新Wish暫時只得2.0及1.8版本。

■揸住部全新Wish2.0於賽道上試車，第一次感受到七人車跑起上嚟都好好玩。

內外升級更跑化

落到場，當然要試VALVEMATIC引擎嘅實力，起步反應明顯比以前爽快，1.2公里長嘅賽道有幾個大小彎及障礙物，操控一向輕鬆舒服嘅Wish當然唔難應付。兜咗幾個圈摸熟賽道後，對腳開始越踩越深，礙於七人車嘅車身及懸掛，感覺難免有點飄。由於大部份Wish車主係愛飆車嘅年輕爸爸，全新嘅Wish2.0加咗DynamicSportMode，換上七速CVT波箱，連同循迹控制及電軚嘅配合，刻意將Wish2.0跑化。啟動SportMode，發現貼地性能及軚感轉變都幾明顯，每次高速入彎後營造出嚟嘅響胎聲，實在令人越飆越過癮，亦終於明白唔落Track係試唔到SportMode嘅分野。
至於外形及配備，最大分別係由7座變6座，中排兩張獨立座椅坐得更舒服，車頭一對牙仔鬼面罩更係新一代Wish嘅標記，內櫳以紅線縫製嘅點綴及兩側拋沙板嘅動感包圍都係Wish2.0獨有嘅特色，內外都強化咗跑味，各位爸爸不妨諗諗送自己呢份咁好玩嘅父親節禮物啦。