政制向前走大聯盟聽日舉行大集會兼遊行，維園萬人逼爆不在話下，大家食完海鮮、點心，或者為咗收200蚊，梗係要交足貨撐政改，八方噚日又收到料，撐政改食海鮮、蛇宴可能都未夠吸引力，連韓國燒烤都有得食！
平均消費最少百元
根據線人報料，工聯會荃灣地區服務處聽日喺荃灣英皇娛樂廣場間漢和韓國料理招呼工友食韓國BBQ，之後包埋旅遊巴出發去維園，一齊參加撐政改大遊行，韓食連埋來回旅遊巴接送，收費筍到難以置信，竟然只係廿蚊！
網民指呢間舖頭平均消費100元至150元，只收廿蚊，扣除車費，有人質疑工聯會形同請食飯載人去遊行。工聯會領導人棠哥批評職工盟收工友一位40蚊飲茶，等於畀錢叫人遊行，工聯會收20蚊一位食韓國燒烤，職工盟比較之下，相形見絀。
聽日維園有起錨大龍鳳，個別紅衫軍聲言會踩場，雙方都係火爆之人，擦槍走火機會不小，八方但願冇不愉快場面，長毛則棄打地面戰，據講會採取高空攻勢，已物色一、兩個有利地方，屆時會架設巨型喇叭唱對台。