曾幾何時湯告魯斯（TomCruise）是荷李活第一型男，現已人到中年的他，雖有大班後浪湧至，但在新片《戀戰特務王》（KnightandDay）中，靚佬湯又再次扮型，全因老拍檔金美侖戴雅絲（CameronDiaz）的邀請，令靚佬湯繼《職業特工隊3》（Mission:ImpossibleⅢ）後，又再次飛車、槍戰，繼續做其動作型男。
撰文：戶川淳
在新片《戀戰特務王》中，兩名荷李活天王天后級人馬湯告魯斯與金美侖戴雅絲，繼十年前拍攝愛情電影《魂離情外天》（VanillaSky）後再度合作，金美侖表示等足這機會十年，二人終於有機會再演情侶，演繹荷李活式浪漫冒險喜劇。
互笠高帽
故事講述，二人於異鄉機場偶遇，登機後把酒談歡火速撻着，但金美侖進了洗手間時，靚佬湯竟以武力制服了機組人員，金美侖慌失失捲入國際大陰謀之中，生活起了180度變化，靚佬湯特務王身份曝光，金美侖與他變成逃命情侶，她被迫幫靚佬湯抗敵。
自合作《魂離情外天》後，金美侖與靚佬湯一家變成老友，今次終於再能與老友合作，金美侖回想起當年往事，她指拍《魂》片時，自己仍算經驗淺，但靚佬湯對他照顧有加，她當時已十分欣賞靚佬湯的自信心。當她看過《戀戰特務王》劇本後，認為是時候再度合作，便立即找靚佬湯，原來當時他亦正構思另一角色，覺得可以將兩個角色融合，加上靚佬湯認為跟金美侖拍戲十分好玩，所以一口答應。靚佬湯又大讚對方勇於嘗試，有幽默感亦有才華。二人雖然老友，但仍不忘互笠高帽。
對抗蠻牛
兩位天王天后再次合作，拍攝過程又啱晒二人愛玩的性格，金美侖與靚佬湯要到奧地利、牙買加及西班牙為《戀》片拍外景。其中一場戲他們要駕電單車闖進西班牙的SANFERMIN奔牛節，雖然相當危險，但原來靚佬湯一直渴望參與這個活動。不過，由於拍攝過程中發生過蠻牛衝入攝製場地事件，令靚佬湯都有點心慌慌，為免工作人員擔心，他都要扮鎮定。金美侖亦表示面對危險鏡頭不能退縮，她更幫手安撫工作人員。
香港上映日期：6月24日
靚佬湯咀老婆首映搶鏡
《戀戰特務王》於西班牙取景，全球首映亦揀選在西班牙塞維爾舉行。在當地時間6月16日，湯告魯斯與妻子姬蒂荷姆絲（KatieHolmes），連同女主角金美侖戴雅絲及導演JamesMangold出席。靚佬湯又例牌與妻子在鏡頭前攬攬錫錫大晒恩愛，二人成功搶鏡。靚佬湯在首映中表示，記得自己8歲時就儲錢看電影，很明白觀眾對電影要求很高的心理，所以今次就拍了一套能滿足觀眾的電影。至於女主角金美侖就曾在成人雜誌中公開大膽言論，指該片中她在飛機上認識靚佬湯，她自己本身也愛在飛機上性交！