成立咗差唔多兩年嘅香港商品交易所，真係阻滯多多，一嚟佢仲未攞正牌，二嚟中證監又禁止外資期貨交易商利用內地倉庫交收，令到商交所到家都未有投資產品正式推出市面。不過，商交所吸引力非同小可，一直都有新股東注資，中遠控股（1919）母公司中遠集團、工銀亞洲（349）都係創始股東，印度RelianceMoney亦有入股，噚日俄鋁（486）大股東歐柏嘉揸住嘅俄羅斯主要投資礦產能源嘅發展基金En+，亦都宣佈買咗商交所一成股份，成為創始股東。嘩，又中資又印資，家有埋俄資，商交所真係成個「聯合國」咁喎！
商交所係私人發起，08年6月成立嗰陣高調咁得到財爺曾俊華嘅祝福，仲喺佢哋個網頁度拍埋片，高姿態咁話樂意見到商交所成立，主席張震仲同煲呔曾相識多年。商交所董事局亦人才濟濟，港鐵（066）主席錢果豐、人行貨幣政策委員會委員樊綱同港交所（388）前董事陸恭蕙都係獨董。