洪興仔：李老闆，今日啲西冷牛扒靚唔靚呀？同我嚟個鐵板西冷，一於鋸個扒、食好啲！
李老闆：嘩！洪興仔，發咗達呀，食得咁豪，係咪贏大錢？
洪興仔：贏大錢就唔敢講，買中咗瑞士冷W，收番多少咁啦！
戰神：我一早都話呢啲公眾熱門要睇定啲先啦，賠率唔好分，大大注買，贏咗都唔夠買驚風散，結果我買尾場「烏圭」上盤，又執。
洪興仔：戰神，你就醒目啦，我身邊唔少老友都畀三角朱古力啃親呀！
外賣仔：聽講廚房佬都買西班牙輸死，睇怕洪興仔你想件西冷整得好食都幾難！
收銀妹：我都睇到冇晒mood，明明法比仔同F托咁靚仔都唔畀佢哋打正選，都唔知個教練點排陣嘅。
外賣仔：靚仔大晒呀，踢波講狀態，齋睇樣嘅話，我都踢到香港隊正選，陳七都要行埋一邊！
李老闆：算啦，外賣仔，女仔睇波多數盲目追捧靚仔球星，佢已經冇碧咸睇o架啦，畀佢發吓牢騷囉。
戰神：洪興仔，睇你鋸完西冷都仲有彈藥再出擊，今日買咩先？
洪興仔：我就唔信英格蘭又和波，班阿爾及利亞非洲佬連斯洛文尼亞都贏唔到，啲水準同外賣仔真係差唔多，我就唔信英格蘭贏唔到兩球！