【本報訊】天漸暗，風吹得狠，立法會外是黑壓壓的人頭、是人民燒不盡的怒火，清脆的vuvuzela（俗稱魔鬼喇叭）聲、不屑的嘲笑聲和噓聲包圍着「密室辯論」。特首曾蔭權為做好份工，意圖藉「無人論壇」推銷爛方案，結果弄巧反拙，把辭窮理屈的姿態赤裸展現人前。有年輕人看過直播後，認為曾迴避問題，「連誠意都冇埋」，堅決不向爛方案投降。記者：張嘉雯、雷子樂、馮永堅、林社炳
由80後反特權青年和專上學生聯會昨日在立法會外舉辦的撤回政改爛方案集會，參加者由最初下午百多人增至近千人。集會由年輕人念新詩、rap抗爭歌開始，又邀請巿民到台上發聲，有參加者自製曾蔭權「共狗」紙板，台上直斥曾蔭權令香港社會由董建華時代的8號風球變成12號風球，「12號風球佢仲話起錨喎，佢以為自己海龍王呀？」
踏入6時35分，大會直播余曾辯，近百名社民連成員拉隊前往政府總部外，兩邊都看得非常肉緊，社民連成員高呼「撤回方案」、「超錯」，吹起vuvuzela為余若薇打氣。余若薇在開場白說到：「普選唔係夢想，係莊嚴承諾。」社民連成員拍手叫好。
「我覺得佢連誠意都冇」
看到特首猶如考試離題、背誦modelanswer（標準答案），立法會外多次傳出訕笑聲，噓聲四起，有人倒豎拇指。聽到曾揶揄公投失敗，不願意認輸，說「咁樣冇人信你（余若薇）」時，大批巿民又指着螢幕大喊：「你講乜嘢呀！你講自己呀？」又高呼「曾公公下台」。余若薇問政府為何沒有普選路線圖，曾蔭權叫她先通過方案，市民即時大叫：「講大話，遊花園。」
相反，看到余若薇一針見血指出功能組別的問題，現場一片掌聲，「點解街巿呃秤就要見官，賣樓發水就唔使罰呢」。不少人大叫「好」。至辯論末段，曾蔭權「請教」余若薇如何取消功能組別，余回應「我好高興你唔識做，問我點做」，引來全場掌聲，到最後曾拉動面皮，直瞪鏡頭說：「多謝晒香港、多謝晒香港人。」則即場被「噓爆」。
高考生Oscar批評曾蔭權表現極差，「連人肉錄音機都不如，佢迴避巿民問題，講埋啲廢話中嘅廢話，令我對呢個政府、呢個政改方案同埋佢個人都更加反感。原本我覺得佢係有誠意嘅，但係個方案唔可以接受，家我覺得佢連誠意都冇」。
「當我哋細路，非常卑鄙」
21歲的莊小姐指曾蔭權「好似背緊稿」，又指政改方案增加功能組別最令她感到憤怒，「因為我哋一直都係想減少，但係佢反而去增加，今次辯論令我更加反對呢個方案」。
學生陳小姐則指曾蔭權抹黑對手的手段卑鄙，「佢一路不停咁抹黑緊余若薇，但係就迴避巿民一直想知嘅問題，我想知第日係咪有真普選，但佢淨係講『你去咗先啦，你信我哋啦』，當我哋三歲細路咁，真係非常卑鄙」。
社民連成員、維園阿哥任亮憲看完直播後說：「睇完之後當然更加反對呢個爛方案啦！」曾是男拔辯論隊成員的他指出，曾的論點不但沒道理支撐，回應對手時更答非所問，沒做到真正辯論，「佢只不過將啲嘢放入自己想表達嘅論述上」。相反余若薇在內容、表述、態度、說服力各方面均大獲全勝。
觀眾意見
