陳冠希（Edison）為撐前晚農夫演唱會，當晚自淫照事件後首次踏上紅館舞台，事後亦有出席慶功宴，至於他何時再踏舞台？Edison直言：「我冇諗，做好新歌先等大家聽吓，講真我上台有壓力，好怕紅館，我諗我唔會喺紅館唱，有陰影，感覺唔舒服。」Edison透露新碟將於10月推出，當中八成是國語歌，其他是廣東歌，歌詞則全是自己的心聲。
復出順其自然
為了新碟Edison表示屆時會做宣傳，豈非10月是他復出之期？Edison說：「唔知呀，乜我有走開過咩？可能係停咗，一切順其自然，其實我一直都係工作緊，家最緊要自己開心。」是否依舊計劃賺夠一億和女友Vincy結婚？Edison笑言：「我仲有好多要賺，最緊要係自己努力，錢多未必會開心。」問女友有否聽他的新碟，Edison坦言她只鍾意他的人，一向甚少聽他唱歌。
採訪：馬建華
攝影：黃文成