特首同反對黨黨魁辯論政改，中央顯然十分緊張，中聯辦主任彭清華、外交部駐港特派員呂新華同多個政協，噚日去會展出席友好協進會慶回歸13周年兼協進會成立21周年活動時，都冇心機敬酒、吃喝，一到場就進入預先set好大電視嘅貴賓室，坐定定睇政改電視辯論直播，主禮嘅統戰部副部長尤蘭田咁啱遲到，直到辯論尾聲先抵達，錯過世紀辯論。
辯論結束，煲呔表現有目共睹，勝負自有公論，現場消息稱共幹、政協普遍認為煲呔表現平平，唯一冇失分係忍得住冇黑面。政協常委陳永棋唱反調出來做啦啦隊，大讚煲呔表現勝過余若薇，又指余若薇係大狀，專長係不論正、反都能講出大道理，至於辯論總結發言時余若薇聲淚俱下，陳永棋指十足電視劇打官司場面，暗踩余若薇。