80後、90後社運分子、示威人士同老鬼唔同，個人主義鍾意玩即興，習慣網上溝通，在facebook互通消息，警方要收風，都要與時並進，噚日又有新招。
主動遞卡片被拒
噚日立法會外有集會為余若薇打氣，地下電台主持梁穎禮在場，佢以往衝擊「戰績」彪炳，因此警方十分關注佢嘅動向，噚日派出幾個身穿灰色T恤嘅便裝警花，向阿禮同另一80後周諾恒埋手，主動遞卡片話想識吓佢哋。
無事不登三寶殿，阿禮同周諾恒又唔係太隨便嘅人，即時話冇興趣認識幾位師姐，連卡片都唔接。幾位警花可能冇預期過會食檸檬，反應無奈，其中一個警花更顯示一瞬即逝嘅不屑表情。兩個o靚仔不識抬舉，難怪師姐嬲啦。