【北京直擊】最近蔡卓妍（阿Sa）成日話自己生咗個小baby，其實佢係指自己首隻國語碟《AsASa》。噚日阿Sa喺北京舉行記者會，見佢一身公主打扮出現，記者問佢仲喺度扮細個？阿Sa話：「家都27歲，都仲可以扮細，所以要盡量扮，到咗30歲就唔可以再扮。」不過阿Sa又話自己唔怕30歲來臨，佢仲話30歲不知幾咁有型喎！
「關你屁事」
最近傳阿Sa同前夫鄭中基（Ronald）復合，佢一再強調佢哋冇復合，阿Sa甚至話佢哋完全冇聯絡，相信Ronald可能完全唔知佢出新碟，所以直到家都未有收到對方恭喜。雖然失婚，不過阿Sa一直都處之泰然，佢以一副樂觀態度話：「每個人生嘅過程都係經驗，可能喺其他人眼中嘅失敗，但對我嚟講係上咗一課，未來更知道人生要點樣走，人生總有高潮低潮。」阿Sa仲笑笑口話成日被人問感情事，有時都想講一句：「關你屁事！」至於好姊妹鍾欣桐（阿嬌）就好有心，透過片段向阿Sa送上祝福，不過阿Sa坦言家各有各忙，有時都唔係好習慣，所以先前佢都有跟草蜢請教可以點樣習慣。