噚晚政改決戰揭開序幕，戲肉係下星期三立法會投票，社民連事先張揚會號召市民到中環爭取真普選，火速印成10萬份《623戰訊》，呢幾日會喺港鐵沿線派發。社民連義工多，今次卻要另聘專人派戰訊，皆因社民連支持者多數鍾意睇波，近日晚晚捱夜睇世界盃，所以日頭冇精神幫忙派戰訊。
呢份熱辣辣戰訊大字標題叫市民下星期三請假去中環包圍立法會，主席陶君行話暫時唔知道有幾多人到場，估計三幾千人冇走雞。下星期三立法會開會辯論政改方案，恐怕拗足一日都搞唔掂，大家可能要攞多日假。
社民連上次賣禮義廉T恤被海關找麻煩，噚日新推出參考起錨口號嘅「超錯」Tee，呼籲大家下星期着上去中環，唔知今次煲呔政府會唔會又搵海關做嘢呢？