港股不經不覺連升第7日，美中不足係成交仲未夠堅，呢種升法如果在大牛市時期，唔少股份可以炒到飛天，家陣當然係兩回事；個市短線上到20500左右可能就遇上阻力，市場只有少數股份能跟隨大市節奏，散戶如果捉得正，有糊應該要食。
內地已有消息醞釀，發改委正研究上調電價，因內地電力需求又見增加，今年首5個月發電量上升21%，同期用電量亦升23%，而且電煤價格今年以來上升逾10%，唔少電力企業都公開預測電價有望上調。消息傳出後，一眾電力股靜極思動。
論賺錢能力，華潤電力（836）去年純利上升2.1倍，達53.17億元，表現遠勝同業，業績理想主要受惠新電廠投產及控制成本得宜。潤電5月售電量達703.84萬兆瓦，按年升31.4%，首5個月售電量累計達3641.82萬兆瓦，增幅41%。如果落實下半年加電價，以潤電表現計肯定相得益彰，昨日微跌0.5%，收15.94元，現價唔怕買，獲利先睇18元。
方星俠