26個英文字母入面，未來10年邊個最受歡迎？答案係「D」字。唔好心邪，講緊嘅唔係o靚模，而係下一代嘅3D世界。
從3D電影到3D電視，微軟、Sony同任天堂即將加入電玩戰團，唔單止畫面3D，連操控上都力求立體化，玩法好似Wii咁指手劃腳周身郁。電腦都好快可以3D，早前台灣電腦展，Acer同華碩已展出首部3D手提電腦。
《阿凡達》一炮而紅，3D入屋成為大趨勢，大廠急於搶灘開發新產品。按DisplaySearch估計，今年全球電視機銷量超過2.2億部，LED電視銷量目標3200萬部，到2015年滲透率達78%。
投資者定必想起家電下鄉股。其實即使有政策扶持，家電舊換新政策試點增至28個省市，以每部電視最多補貼400元人民幣計，預期只能刺激農村對小型電視嘅需求。大家炒時炒要適可而止，家電下鄉並非靈丹妙藥。
LED產能急增恐壓毛利
到底係咪有咁多人願意換機睇3D仍屬疑問，反而最上游生產LED晶粒廠就實食冇黐牙賺大錢。LED晶粒係生產屏幕嘅原料，現時生產最多、質素最高係台灣廠商，過去幾個月生意多到做唔切。按LEDinside資料顯示，4月份整體LED晶粒營業額增長達89%至40.29億元新台幣，多間二三線LED晶粒廠生意都錄得倍數以上增長。
真明麗（1868）日前宣佈建設LED晶片廠時，中國趨勢（8171）先至話進軍LED照明，雖然慢咗幾拍，不過管理層暗示公司有軍方背景，炒作焦點根本就唔喺本業。內地晶片廠最大問題係質量未達國際要求嘅光亮度，但根據真明麗通告，公司已有能力製造2100mcd（亮度單位）晶粒，同台灣水平差不多，今年11月投產，每月產能4.7億片。
可以預期，未來會有更多公司利用此概念借題發揮甚至借屍還魂，延續短線炒作空間。但投資者忌大貪，因為今年全球有超過500台生產機組陸續投產，四分之一定單來自內地廠家，行業產能有機會急增，壓低售價令毛利受壓，而且第四季通常係LED淡季，未知之數仲好多。
胡孟青