關於住在上水而又無法安裝有線電視的人士，如何收看電視直播世界盃，一位家居元朗的讀者K來電郵云：
「左丁山先生：我係你的讀者，想向你住在上水的朋友提供收睇世界杯的最好最簡單方法，因為上水很近大陸，只要他有高清機頂盒，應可收睇大陸（cctv高清）台，如收不到，可把天線指向大陸，一定ok，我家在元朗，亦係用這方法，收得好好，但當把天線指向大陸後便收不到香港台，有得有失，世界就係咁o架啦。」
此乃民間智慧，有人睇咗唔高興都冇辦法。
又有讀者S來英文電郵講及不同帳簿之事，讀者S話唔好當香港啲廠家儍，冇台灣加工咁好料，實際上以佢所知，香港廠商亦有起碼三本帳簿喎：（一）在香港開設一間A公司收海外訂單，此公司帳簿可供客戶參考；（二）A公司與同一股東嘅B廠簽約，產品由B廠製造；（三）B廠再與大陸一間C工廠（亦係同一股東）簽代工合約，代工嘅利潤極低，幾乎蝕本；（四）C工廠與內地政府稅局有偈傾，經過三層分工，最後利潤歸邊間公司所有，視乎大老闆取態及稅務安排。
以此詢問廠家C，佢唔承認，亦唔否認，只係話做代工（contractmanufacturing）嘅獲利率在歐美客戶眼中，十分透明，想遮遮掩掩亦無辦法。原因係客戶（大品牌）嘅產品，百分之九十九嘅零件由客戶自行購入，集埋一齊送去代工工廠，計埋代工工人薪資之後，代工賺幾多毛利，一目了然。廠家C發牢騷話：「歐美品牌好講漂亮說話，要講人權，講安全舒適工作環境，講員工福利，久唔久就派人嚟審查，講就天下無敵嘞，到簽約之時，佢哋對價錢揸得硬一硬，講到流牙血，都未肯加價，而我哋點有空間去加薪、去改善工作環境呀？」
潮流興增值，興改變生產模式、講搬廠，廠家C認為姿勢大於實際。譬如搬廠返台灣，去邊度搵幾十萬工人？如果間間廠講增值，講機械化自動化，珠三角千千萬工人失業之後，怎麼辦？有人又話加薪好呀？工人人數多，佢哋多咗錢就可以增加消費刺激內需，推動經濟增長，道理好似好啱，但如果即時加薪，可以即時刺激消費嘅話，所有國家不如一紙命令，就全部工人加薪啦，經濟學教科書可以全部燒毀！