世界盃已經打咗一個禮拜，好明顯一個現象就係開「下盤」居多，搞到唔少球迷即使「貼」中捧場球隊贏波，可能都要輸錢。有資深賭徒認為，咁多蠱惑波，可能係家陣足球彩池越來越大，投注力量可能真係影響到賽果。
零食、飲料呢期大賣，照計中國旺旺（151）旗下產品應可受惠世界盃，事關其產銷的食品多樣化，涵蓋米果食品、乳品類及其他飲料、果凍等休閒零食，又有銷售酒類，均與食有關，估計世界盃期間銷售量必有相應增長。另外，內地掀起加薪潮，一般民工每月薪金起碼多幾嚿水，自然會較以前捨得使，旺旺呢類消費股亦值得睇好。
旺旺去年營業額及純利分別上升10%及19%，至17.11億美元及3.13億美元。集團今年將持續「送旺下鄉」策略，與國策不謀而合，以提升農村市場滲透率。旺旺剛剛於周一創出52周高位6.60元，周二微跌0.04元，收報6.42元，可趁回吐買入，目標先睇7元。
方星俠