周杰倫同蔡依林（Jolin）呢對舊情人日前喺台灣同台演出完畢，佢哋先由台北小巨蛋返屋企，然後周杰倫就再出門參加大會慶功宴，Jolin就唔見現身，之不過慶功宴結束後，原來周杰倫打電話請Jolin去下一個私人慶祝party，顯示兩人感情的確唔錯。
傳談婚論嫁
睇嚟雙J復合傳聞未必假得晒，噚日台灣就有報道話周杰倫送咗隻卡地亞白K金鑲鑽定情戒指畀Jolin，仲應承未來會娶佢，畀佢由J女郎晉升為周太。若佢兩個復合嘅話，相信最冇癮就係華納唱片嘅大中華區總裁陳澤杉，因為華納同Jolin仲未傾掂續約，畢竟周杰倫對陳生做事作風一向冇好感，之前佢哋仲曾經為唱片銷量公開罵戰。
如果周杰倫同Jolin復合，好肯定Jolin續約華納嘅機會唔會太高。淨係日前佢幫周杰倫做個唱嘉賓都冇話畀唱片公司知，就足以顯示佢唔打算留喺華納啦！