民主黨日日笑曾班子拋錨，唔知係咪叫得多，搞到自己都拋錨。今年由李華明做龍頭鼓手嘅「民主龍」，噚日出戰大埔龍舟競渡男女子混合賽喺初賽九隊中排第八，冇得留低；民建聯龍舟隊喺另一組第二回合排第五，雖然都係輸，但都叻過民主黨。大埔區議員任啟邦同八方講，今年特別搵一批80後、90後黨員同義工上陣，以為會有好成績，「點知班衰仔冇力！」佢話舊年由卿姐做鼓手，今年改由肥仔明領軍，「民主龍」負重磅，要贏有難度。不過講到底，民主黨冇乜時間練習先係落敗主因，佢揚言明年一定要打破冇獎攞宿命，八方聽住先啦。