港府趕時髦推廣電動車，噚日宣佈同港燈喺港島天星碼頭同天后兩個政府停車場內設立電動車充電站，為顯示推廣電動車有心有力，政府同兩電已喺全港39個地點設置電動車輛充電設施，又表示本年中前會再多23個地點。位於天星碼頭及天后停車場嘅充電站，為電動車提供一般充電服務，用戶可透過八達通付款，不過，推廣期內電動車輛使用者可免費獲港燈提供嘅充電服務。點解咁着數，無他嘅，香港家陣有幾多架電動車行駛？港燈豪晒畀你，都係有限錢，況且羊毛出在羊身上，電動車出得嚟行，遲早要還。