世博200幾個展館當中，最豪嘅首推沙地阿拉伯館；至於最高效率，就應該係復星（656）董事長郭廣昌領軍嘅民企館，間館真係充份反映內地民企嘅活力o架。一場金融海嘯，西門子臨時縮沙，將世博展館退番畀大會；郭廣昌臨危頂上，連同阿里巴巴（1688）主席馬雲、民生銀行（1988）董事長董文標，仲有蘇寧董事長張近東等一眾友好民企老闆共16人，喺短短一年入面搞掂個館，比起花五年時間籌備嘅國企館可算神速呀。
佢哋請咗搞北京奧運開幕禮嘅班底，設計咗一個「活力矩陣」，用藝術展現出民企嘅活力精神，聽講口碑都唔錯。隔籬嘅萬科館，老闆王石就帶畀觀眾充實嘅環保信息，場內仲展示咗佢攀登珠穆朗瑪峯執垃圾嘅相㖭！
李華華