經常出嚟大鬧發展商起屏風樓同發水樓嘅「環保觸覺」主席譚凱邦竟然做咗譚老闆，有份投資嘅樓上舖綠色生活主義噚日開張大吉，賣各類環保家居用品同食品。公民黨陳淑莊、民協馮檢基都捧場，陳淑莊仲真金白銀拎250蚊買咗張譚老闆極力推介嘅藤蓆，絕對係「瞓身」支持。陳淑莊話細個時都係瞓藤蓆，好凉爽，舒服過開冷氣。
與朋友合股投資
譚老闆強調，綠色生活主義係同幾位朋友合資20萬元嘅小生意，佢佔好少股份，想用社會企業方式推廣環保，背後冇任何團體或機構支持，同環保觸覺亦完全無關，兩者財政獨立。由於小本經營，只可以喺荔枝角區工廈開樓上舖，最樂觀只能收支平衡，日後賺錢，會捐助其他環保團體。
香港人買嘢鍾意格價，八方噚日上網搵料，發覺綠色生活主義賣嘅環保洗潔精同洗衣液，比個別環保店舖貴十幾蚊，而一啲公平貿易餅乾同咖啡粉就貴一、兩蚊。譚老闆話登記做會員有折扣。有興趣可到呢個網頁 http://www.ecoshop.com.hk