台灣駐港機構光華新聞文化中心新主任羅智成係台灣名詩人，端午前夕、噚晚舉行詩人聚會，最近傳出患上肺癌嘅詩人梁秉鈞（筆名也斯）都有現身，朗讀咗幾首自己嘅作品。
任職嶺南大學中文系比較文學講座教授嘅也斯著作等身，陪伴很多香港文藝青年成長，噚日好多佢嘅朋友同學生都關心問候佢嘅健康。也斯話自己之前可能工作太繁忙，影響咗身體，去年尾證實患咗肺癌，家接受治療。佢話日常生活冇乜受影響，只係較易疲倦，要多啲休息。又話性格使然，好樂觀面對病情，亦會繼續教學工作同埋創作。
港台詩人聚會
端午節紀念詩人屈原，羅智成噚晚感嘆，恐怕香港冇乜人記得端午節又叫詩人節，所以光華破天荒搞咗一次香港同台灣詩人嘅聚會。羅詩人承諾，佢任內光華每年端午都搞詩人聚會，有機會會邀請內地、澳門及東南亞詩人嚟交流。