李老闆：車神，今晚頭場都未開波你就蒲頭，晏晝車咗幾支大旗呀？
車神：啱啱相反呀，人人趕住睇世界盃，家條街靜過鬼，搵個客都難；橫掂冇客，泊埋o架的士坐低睇波好過！
收銀妹：唔使咁愁呀車神，私人醒杯凍奶茶畀你，順番條氣。
車神：收銀妹，今晚着到咁靚，約咗男朋友去街街呀？
收銀妹：係呀，仲有成班friends㖭，book咗間卡拉OK房，男嘅睇波，女嘅唱歌。
外賣仔：你都識足球咩，足球比賽幾多個人打你知唔知？
收銀妹：你當我好似影壇大哥咁呀，以為世界盃係巴塞隆拿對AC米蘭咩？今晚西班牙登場呀，F托、沙治奧拉莫斯、法比加斯，又靚仔又好波，我留意咗佢哋好耐啦！
車神：生意淡薄，不如賭博。收銀妹，咁你支愛隊數唔數到瑞士兩球開上盤先？
李老闆：車神，你問錯人啦！收銀妹都唔識賭波，咩叫上、下盤都唔知。嗱，介紹個熟客你識，佢叫戰神，新填地街冇咩人唔知佢賭波最精。
車神：戰神兄，幸會，今晚西班牙場波有咩心水？
戰神：西班牙呢隊公眾熱門，我就唔搞住，賠率又唔好分；反而A組打第2輪，烏拉圭首場對法國守得幾穩，反而南非對墨西哥，班波已見晒底，我博烏圭開到上盤。