港姐抵印度　又熱又攰
馮仁昭四圍超：的骰湯唯大勇　脹爆祖賢爆瘡 - 馮仁昭

【印度直擊】每年候選香港小姐都要經過特訓期，睇吓邊位參賽者夠韌力跑出，頭炮考驗佳麗狀態係拍外景，今年大會安排《2010香港小姐競選》十五位準港姐去到神聖又落後嘅印度進行八日旅程兼特訓，經過一輪舟車勞頓後，眼見有啲女仔明顯撐唔住開始捱到殘。

38度佳麗包到實

噚日大隊分別去到德里景點紅堡同甘地墓拍攝，佳麗喺高溫下着住印度特色嘅衫，個個密密實實，噚日熱到攝氏38度，個個身水身汗，啲女仔要頻頻補妝，「脹爆祖賢」15號張秀文本身皮膚已經唔係光滑，噚日見佢面上爆瘡兼眼袋浮現，化妝都遮唔到，個樣勁殘，張秀文話：「唔夠休息，坐完飛機又水腫，皮膚未適應，會盡量保養。」張秀文仲死撐話自己捱得苦。
但係大熱佳麗「的骰湯唯」11號李文煊就狀態依然大勇，佢話覺得印度比想像中乾淨又唔係咁多蚊，遊客係咁望實佢都唔驚，呢啲咪大方囉。
馬國明同羅仲謙係今次印度之旅嘅嘉賓，當地風土人情唔許可露太多肉，兩個大男人着住短袖T熱爆，想赤膊又唔得，真係難頂。