青年民建聯前主席張國鈞以為北極有企鵝，其他成員原來都好儍好天真，當佢哋嘅大佬級人馬都未能游說民主黨轉軚，做細嘅竟然敢帶同請願信，噚日踩上民主黨總部，呼籲白鴿黨支持政改方案。
只係幾名o靚仔臨門，民主黨以青年委員會主席莫兆麟等第N梯隊人物「恭迎」。民主黨雖然對轉軚建議SayNo，但過門都係客，青委會請民記o靚仔入黨總部，反游說青年民建聯支持2017同2020年落實真普選。民主黨伸出橄欖枝令青年民建聯飄飄然，成員之一嘅張思晉膽粗粗話考慮去埋社民連總部請願。
八方噚日話有網民呼籲6.23包圍立法會時吹南非「魔鬼喇叭」壯聲勢，刊出張海報出自「80後反特權青年」之手，唔係高登網民傑作。