1.益咗德國隊？ 2.要踢橙色波？
3.非洲隊蝕底？ 4.踢地波閉翳？
南非世界盃唔單止係首個喺非洲舉行嘅世界盃，仲可能係第一個「白色世界盃」。因為據天氣預測，南非喺呢兩日會有冷鋒，氣溫急降之餘，喺地勢高嘅地方仲可能會落雪；而喺今屆10個世盃球場中，有6個都係喺海拔1,200米以上嘅地方，球迷睇波之餘，仲隨時可以欣賞埋雪景㖭！
由於近屆世盃決賽周多數喺北半球舉行，好似94美國世盃，就試過有啲比賽喺攝氏40幾度高溫下進行，但今屆由於喺南半球嘅南非舉行，時值冬天，事情就唔係咁講喇！
專用波冇橙色點算？
據天氣報告講，南非呢兩日會有冷鋒，山區尤其受影響，晚上氣溫預料會降至攝氏零下6度，仲會落雪；據講，最有機會欣賞到雪景嘅，係喺海拔1,753米高嘅艾利斯公園球場同足球之城球場。
前晚喺開普敦嗰場意大利對巴拉圭已經落緊大雨同落雹，仲見到藍軍後備席上有職員着羽絨。幫〈蘋果體育〉喺南非直擊嘅TVB特派記者Keyman就話，好期待非洲落雪，但佢家身處嘅約翰內斯堡唔算好凍；加上當地極為乾燥，冇想像中咁凍，尤其中午時分，有太陽時要脫去一件又一件嘅大褸，「不過呢度日夜溫差好大，夜晚一定要着多件衫。」天氣凍，有冇影響球迷睇波心情就唔清楚，但肯定國際足協會幾頭痕；因為據聞國際足協同南非籌委，好似冇準備專為落雪而用嘅橙色世盃專用足球。另外，如果真係落得成雪，相信非洲球員會更唔着數，佢哋嘅強項係耐熱，但唔耐寒，冰天雪地叫佢哋點踢好波？
德國擅雪戰慣專用波
歐洲隊就唔同喇，佢哋多數唔怕凍，德國仲可能係最大得益者，因為德甲一早用今屆世盃專用波，你話同佢哋喺德甲踢雪地賽事有乜分別？不過對啲技術型球隊嚟講，就可能係壞消息囉，事關落雪就一定影響場地質素，唔知巴西、西班牙同阿根廷嘅地面推進，會受幾大影響呢？
當年今日：16/06/1990
英格蘭與荷蘭在F組分組賽互交白卷，英軍隊長白賴仁笠臣在比賽中傷出，而皮亞斯完場前射入罰球卻被判詐糊。
有數講：202
塞爾維亞前鋒施積身高2米02，是今屆世盃決賽周最「高人一等」的球員；英格蘭前鋒高治以2米01緊隨其後，南非後衞馬菲保夫以1米98排第3。有趣的是，英軍陣中亦有「小矮人」，他便是1米65的中場艾朗連儂。