在議會內不斷發言「拉布」拖延時間原來唔係議員專利，特區高官都精通此道。逢周三立法會會議，議員可提出六條問題口頭質詢官員，每條問題連回答時間最多20分鐘，不過官員講廢話成性，近來回答質詢時，個人表演隨時講足十幾分鐘，變相剝削議員跟進提問時間，好蠱惑。
亂噏廿四言不及義應該係議員政客專利，李永達不許州官有樣學樣，去信立法會內務委員會，要求討論修改規定，放寬口頭質詢時限，俾議員最少有10分鐘追問時間。此外，李永達又建議增加每次立法會例會議員書面提問數目，由現時14條，改至容許所有議員最少都可以問一條，人人有份，唔使排隊爭餐飽。
暫時未知其他黨派對高達建議反應，但如果官員拉布積習不改，議員追問時間又延長嘅話，立法會開會時間肯定有增無減。