睇世界盃，大家當然目不轉睛望實個波同埋靚仔球星，較少留意場側嘅廣告牌，今屆突然見到個YingliSolar廣告牌，看似普通話拼音，原來係美國紐交所上市、總部位於河北保定嘅內地光伏產業龍頭英利綠色能源（YGE）。
事先聲明，本文並非投資建議，只係想話畀大家知佢係首家中國企業晉身世界盃贊助商，亦係內地光伏產業四大龍頭之一，但對於本地普羅投資者，英利知名度唔高，憑乜晉身世界盃大舞台？
今屆8家世界盃贊助商，美國代表係百威啤酒同麥當勞、印度有IT公司MahindraSatyam、巴西有食品廠Seara，而中國就有英利能源。從贊助商陣容半數來自新興市場品牌，可見經濟重心轉移，唔怪得連財經雜誌《FinanceAsia》都以「你想唔想成為Brazilianaire」做專題，仲話中國有嘅係錢、巴西有嘅係潛力，金磚四國果然架勢。
多晶硅競爭烈被壓價
不過，唔係有錢就大晒，英利賣點係中國概念同再生能源，佢上屆已同世界盃結緣，負責替德國場館設計太陽能裝置，項目質數獲廣泛認同，今屆再下一城，為南非20個場館安裝太陽能設備，當地陽光充沛，肯定成為公司省招牌之作。
英利更為球迷準備咗神秘禮物太陽能手機充電器，摺叠式設計，細細個只有150克，好似縮骨遮咁，攤開後就可吸收太陽能。睇波期間打開佢，喺太陽下曬6個鐘就夠部手機叉足電。
聽落好似得啖笑，但呢間07年至「走出去」上市嘅公司業績唔講得笑，09年營業額達72.55億元人民幣，增長86.6%；整體毛利率23.6%，第4季已改善至超過29%。
今年4月內地多晶硅進口量創新高，反映定單未受歐洲債務危機影響。太陽能接收板同電池等生產及付運往歐洲需時5個月，預計下半年生意仍理想。
讀者可能即時想起，本地最大嘅多晶硅生產商保利協鑫（3800）照計會受惠，不過行業競爭激烈，保利協鑫今年第一季銷量按季大升25%，但平均售價由09年第一季每公斤90美元，跌到今年得50美元，加上歐元急跌都會影響盈利。由此可見，光伏產業嘅上游確係「好睇唔好食」，即使有中投撐腰，都唔係靈丹妙藥。
胡孟青