匯賢智庫主席葉劉淑儀喺反對舊樓降低強拍門檻一役表現勇猛,民望急升,仲搶埋向來係公民黨黨魁余若薇囊中物嘅十大立法會議員評分之首嘅寶座。佢最近想再下一城,同投資推廣署前署長盧維思、醫學會前會長蔡堅以及佢愛將之一灣仔區區議員黃楚峰組成「八成強拍監察組」,繼續跟進強拍條例嘅落實情況。
葉劉吹雞 一口應承
葉劉咬住強拍呢個議題唔放唔出奇,八方覺得成單嘢最有趣嘅,係點解葉劉會同「米老鼠」盧維思、蔡堅走埋一齊?雖然米老鼠同葉劉都曾經係高官,但米老鼠係煲呔愛將,葉劉又冇埋煲呔堆,照理唔係一個圈。蔡堅嘅加入就更加撲朔迷離,唔通因為身份係醫生嘅史泰祖同葉劉試過拍檔選立法會,愛屋及烏下葉劉夾醫生做嘢都啱key啲?
葉劉噚日親自解謎,原來吸引到米老鼠、蔡堅同佢拍住上嘅原因,就係兩位名男都係強拍苦主。公務員出身嘅米老鼠同好多同僚一樣,喺中區麥當勞道買咗個單位,貪來往中環返工放工都方便啲。但原來米老鼠幢大廈已經被收購中,米老鼠隨時成為苦主。
至於蔡堅,葉劉話佢住喺太子道舊樓;嗰時葉劉上電台節目狂轟強拍條例,蔡堅都主動烽煙表示不滿,顯然都係有潛質嘅苦主啦。所以當葉劉一吹雞搵佢哋結盟,兩位男士都一口應承,拍心口合組成呢個星光熠熠陣容追打呢條「惡法」。
由於坊間已經有個舊樓強拍嘅苦主聯盟,所以葉劉話佢哋個聯盟會主力跟進條例嘅落實問題,例如政府話有調解機制保障苦主吖嘛,咁佢哋咪一定窮追到底,確保政府唔係齋噏。
舊樓收購 熟悉程序
唔講大家可能唔記得,米老鼠以前做過地政科,對呢啲舊樓收購問題同程序都好熟悉,相信呢條條例有佢把關,政府都唔可以懶懶閒愛理不理。葉劉仲話愛將黃楚峰喺區內收到唔少呢啲苦主個案,成為佢哋監察組嘅強大支援,肯定會比政府更體恤苦主需要。
mailto:[email protected]